អស់រយៈពេលជាច្រើនឆ្នាំមកហើយដែលយើងបានរង់ចាំមើលទូរស័ព្ទ
iPhone ដែលមានអេក្រង់ធំជាង 4 អ៊ីញ ហើយនៅក្នុងឆ្នាំនេះ Apple
ពិតជាបានបំពេញក្តីសង្ឃឹមរបស់យើងមែន ដោយបង្កើត iPhone 6
អោយមានទំហំអេក្រង់ 4.7 អ៊ីញ និង iPhone 6 Plus មានអេក្រង់ដល់ទំហំ 5.5
អ៊ីញឯណោះ។ ទូរស័ព្ទទាំងពីរនេះមានរូបរាងដូចគ្នាបេះបិត
និងលក្ខណៈសម្បត្តិស្រដៀងគ្នាអាចពិបាកក្នុងការសម្រេចចិត្ត
តែបើអ្នកទាំងអស់គ្នាសិក្សាអោយកាន់តែស៊ីជម្រៅជាមួយខេមបូរីផត
នោះអ្នកនឹងសង្កេតឃើញថា iPhone 6 Plus មានលក្ខណៈពិសេសផ្សេងពី
iPhone 6។
រចនាបថ
រចនាបថរបស់ iPhone 6 Plus
គឺដូចគ្នាទាំងស្រុងទៅនឹងរចនាបថរបស់ iPhone 6
ដោយសន្ទះខាងក្រោយរបស់វាស្រោបដោយលោហៈធាតុប្រណិត
រហូតដល់គែមទូរស័ព្ទ មានភាពទាលនៅកែងនៃទូរស័ព្ទ
និងមានខ្សែឆ្នូតគូសបែងចែកនៅផ្នែកខាងលើ និងផ្នែកខាងក្រោម។
ទូរស័ព្ទនេះមានអេក្រង់ទំហំ 5.5 អ៊ីញប្រភេទ LED-backlit IPS LCD
ដែលអាចបង្ហាញរូបភាពបានក្នុងកម្រិតខ្ពស់ Full HD (1080x1920) ភិចសែល
និងមានដង់ស៊ីតេអេក្រង់ 401ppi។ ជាមួយនឹងអេក្រង់ដ៏ធំ
និងកម្រិតភាពច្បាស់ដ៏ខ្ពស់បែបនេះ
អ្នកពិតជាមានអារម្មណ៍ត្រជាក់ភ្នែក ក្នុងការប្រើប្រាស់ទូទៅ
លេងហ្គេម មើលវីដេអូ ជាដើម។
វាមានវិមាត្រ 158.1 x 77.8 x 7.1 មីលីម៉ែត្រ មានទំងន់ 172
ក្រាម រាងធ្ងន់បន្តិច
ហើយក៏ពិបាកក្នុងការកាន់បញ្ជាដោយប្រើដៃមួយផងដែរ
ព្រោះអីគែមខាងលើ និងខាងក្រោមរបស់ទូរស័ព្ទនេះវាវែងបន្តិច
បើប្រៀបធៀបជាមួយនឹងទូរស័ព្ទអេក្រង់ 5.5 អ៊ីញដទៃ។ iPhone 6 Plus
មានបីពណ៌សម្រាប់ជ្រើសរើសគឺពណ៌ទឹកប្រាក់ ពណ៌ទឹកមាសស្រាល
និងពណ៌ប្រផេះ ។
កាមេរ៉ាមុខ ក្រោយ
កាមេរ៉ារបស់ iPhone 6 Plus មានទំហំ 8 មេហ្គាភិចសែល ប្រភេទ
iSight Camera បំពាក់មកជាមួយភ្លើងជំនួយចំនួនពីរ True Tone
ដែលអាចចាប់យករូបភាពបានកាន់តែច្បាស់ដូចធម្មជាតិ
និងងាយស្រួលប្រើប្រាស់ជាងមុន។ កាមេរ៉ារបស់ iPhone 6 Plus
ពិសេសត្រង់ថាវាបានបំពាក់មកជាមួយបច្ចេកវិទ្យា Optical Image
Stabilization ដែលអាចចាប់យករូបភាព វីដេអូបានច្បាស់ល្អ
កាត់បន្ថយភាពព្រាល និងរំញ័រផ្សេងៗ។
រីឯកាមេរ៉ាខាងមុខវិញនៅតែមានទំហំ 1.2 មេហ្គាភិចសែលដដែល ដូច
iPhone 5s អាចថតវីដេអូបានកម្រិត 720hd។ រូបភាពដែលថតដោយកាមេរ៉ា
iPhone 6 នេះគឺមិនសូវជាល្អជាង iPhone 5s
ប៉ុន្មាននោះទេតាមរយៈការតេស្តថត គ្រាន់តែវាអាចថតយក Slow Motion
បានទំហំ 240fps ប៉ុណ្ណោះ។
Hardware
ទោះបីជា iPhone 6 Plus មានតម្លៃថ្លៃជាង iPhone 6
យ៉ាងណាក៏ដោយ ប៉ុន្តែកម្លាំងម៉ាស៊ីនរបស់វាអន់ជាង iPhone 6
បន្តិចបន្តួច។ វាមានរ៉េមទំហំ 1GB ដដែល ប្រើប្រាស់បន្ទះឈីប A8
ដែលមានស៊ីភីយូ Dual-core ល្បឿន 1.4Ghz ARM V8 GPU ប្រភេទ PowerVR GX6450
អាចអោយយើងលេងហ្គេម បើកកម្មវិធី និងប្រើប្រាស់ទូទៅបានដោយរលូន
គ្មានភាពរអាក់រអួលឡើយ។
នៅក្នុងបន្ទះឈីប A8 នេះទៀតសោត Apple
ក៏បានបំពាក់មកជាមួយបន្ទះស៊ិនស័រ M8
ប្រើសម្រាប់តាមដានចលនាអ្នកប្រើប្រាស់ ចាប់ចំងាយ ជំហ៊ាន ជាដើម
ហើយវាក៏មានសមត្ថភាពអាចចាប់យកកំពស់ដែលអ្នកប្រើប្រាស់ទូរស័ព្ទ
នេះតាំងនៅផងដែរ។
iPhone 6 Plus ក៏នៅតែបំពាក់មកជាមួយសន្ទះ Touch ID ដដែល
ប៉ុន្តែវានៅតែរក្សាទំហំតូចដូច iPhone 6
មិនសមគ្នាជាមួយតួខ្លួនដ៏ធំរបស់វាប៉ុន្មាននោះទេ។
ចំពោះទំហំផ្ទុកទិន្នន័យវិញគឺមានបីជម្រើសគឺ 16GB 64GB និង 128GB
ដែលមានតម្លៃខុសៗគ្នាចំនួន 100$។ ចំពោះថ្មរបស់ iPhone 6 Plus
វិញគឺមានទំហំធំគួរសមទំហំ 2915mAh អាចអោយយើងមើលវីដេអូ លេងហ្គេម
និងប្រើប្រាស់បានយូរជាង iPhone 6 ចំនួនមួយម៉ោងជាង។
Software
iPhone 6 plus ដំណើរការដោយប្រព័ន្ធប្រតិបត្តិការណ៍ iOS 8
ចេញពីប្រអប់ ដែលវាគឺជាប្រព័ន្ធប្រតិបត្តិការណ៍ចុងក្រោយបង្អស់
មានលក្ខណៈពិសេសជាច្រើន ហើយក៏ងាយស្រួលក្នុងការប្រើប្រាស់ផងដែរ។
លក្ខណៈពិសេសរបស់ Software លើ iPhone 6 Plus
នេះគឺយើងអាចប្រើជាលក្ខណៈផ្តេកបាន ដូច iPad បាន
ហើយក្នុងនោះក៏មានដូចជាមុខងារ Reachability
ដែលសម្រួលអោយយើងងាយស្រួលប្រើដោយដៃម្ខាង និងមុខងារ Zoom
ប្រើសម្រាប់ពង្រីកអក្សរ និង icon អោយធំ ងាយស្រួលប្រើជាងមុន។
គុណវិបត្តិ
ពួកយើងសប្បាយចិត្តនៅពេលដែលដឹងថា Apple បានបង្កើត iPhone
អោយមានទំហំអេក្រង់ធំដល់ 5.5
អ៊ីញប៉ុន្តែវាមិនបានបំពាក់មកជាមួយលក្ខណៈពិសេសច្រើន
និងខុសប្លែកពី iPhone ជំនាន់មុនៗទាំងអស់។
រូបរាងរបស់វាធំពិបាកក្នុងការកាន់ និងទុកដាក់
កម្លាំងម៉ាស៊ីនវិញក៏មិនសូវជារហ័សខ្លាំង
ណាមួយទៀតវាក៏ងាយក្នុងការបែកបាក់អេក្រង់ផងដែរ។
ចំណាប់អារម្មណ៍
សម្រាប់ខ្ញុំផ្ទាល់ ខ្ញុំមិនសូវជាពេញចិត្តនឹង iPhone 6 Plus
ដែលមានអេក្រង់ដល់ទំហំ 5.5 អ៊ីញនេះប៉ុន្មាននោះទេ ព្រោះអីវាធំពេក
ចាកឆ្ងាយពី iPhone ជំនាន់ចាស់ៗ
ណាមួយទៀតវាក៏មិនសូវជាមានលក្ខណៈពិសេសខុសពី iPhone 6
ប៉ុន្មានឡើយ។ ប៉ុន្តែសម្រាប់អ្នកដែលចូលចិត្តផលិតផល Apple
ហើយចង់ប្រើប្រាស់ស្មាតហ្វូនដែលមានអេក្រង់ធំជាងមុននោះ
អ្នកប្រាកដជាពេញចិត្តជាមួយនឹងអេក្រង់ធំទូលាយទំហំ 5.5 អ៊ីញ
និងមានកម្រិតភាពច្បាស់ Full HD នេះ។
អ្នកអាចស្វែងរកទិញស្មាតហ្វូននេះបាននាពេលបច្ចុប្បន្ននេះ
ដែលវាមានតម្លៃខ្ពស់នៅឡើយទេប្រហែល 1200$
តែតម្លៃនេះនឹងបន្តធ្លាក់ទៀតទៅក្បែរ 900$
នៅប៉ុន្មានសប្ដាហ៍ខាងមុខនេះ។
No comments:
Post a Comment